Monday, November 12, 2012

Suplemen Bimbingan PJJ tgl.11-17 November 2012, Heber 11:1-3, 6-16

Bahan : Heber 11:1-3; 6-16 
Thema : “Dibata Enggo Nikapken Ingan Simehuli Man Kalak Si Tek Man BaNa” 
Tujun : 
- Gelah ngawan perpulungen meteh kerna erti pendungi Tahun Gereja 
- Gelah ngawan ni perpulungen ndalanken kerina dampar kegeluhenna arah kinitekenna man Dibata 

Heber 11:1-3; 6-16 

11:1 Erkiniteken ertina tek nandangi kai si iarapken kita, tek kerna si la idah. 
11:2 Erkiteken kinitekenna kalak sinuria ipujiken Dibata. 
11:3 Erkiteken tek man Dibata kap maka siangka kerina si nasa lit Dibata njadikenca arah kataNa; kerina si teridah ijadikenNa i bas si la teridah nari. 
11:6 Ise pe la ngasup ndalanken si sentudu ras peraten Dibata adi la kin erkiniteken. Sabap kerina si reh ndahi Dibata arus tek maka Dibata lit dingen iberekenNa upah man kalak si ndarami Ia. 
11:7 Erkiteken tek Nuah man Dibata maka ibegina kata pertenget i bas Dibata nari, kerna si nandangi reh si la idahna. Ikutkenna kata Dibata, jenari ibahanna sada perahu si dungna nelamatken ia ras keluargana. Erkiteken si e doni isalahken, janah Nuah ikataken Dibata benar erkiteken kinitekenna. 
11:8 Erkiteken tek Abraham man Dibata maka asum Dibata erdilo man bana, patuh ia, berkat ia ku negeri si ipadanken Dibata man bana. Itadingkenna negerina la ietehna ku ja ia lawes. 
11:9 Erkiteken tek man Dibata maka ia nggit lajang i bas negeri si enggo ipadanken Dibata man bana. Ia ringan i bas kemah bali ras Isak ras Jakup si ngaloken padan si seri i bas Dibata nari. 
11:10 Sabap Abraham nimai kuta si enggo irencanaken dingen ipanteki Dibata, e me kuta si nteguh palasna. 11:11 Erkiteken tek Sara man Dibata maka banci mupus aminna pe ia enggo metua. Tek ia maka isehken Dibata kai si enggo ipadankenNa. 
11:12 Aminna pe paksa e nai Abraham tempa-tempa enggo mate, tapi i bas si sekalak enda nari reh kesusuren si nterem bagi bintang i langit dingen kersik i tepi lawit si la terbeligai. 
11:13 Kerina kalak enda mate i bas kiniteken. Kai si ipadanken Dibata la ialokenna, tapi i dauh-dauh nari enggo idahna si e, e maka meriah iakapna. Terang-terang iakuina maka ia kalak perlajang dingen kesilang i doni enda. 
11:14 Kalak si ngakui si e terang icidahkenna maka ia ndarami negeri si jadi negerina jine. 
11:15 Lanai atena tedeh nandangi negerina si mbarenda si enggo itadingkenna. Adi tedeh kin atena banci denga nge min ndai ia mulihken ku je. 
11:16 Tapi tedehen atena negeri si terulin, e me negeri si i Surga. E me sabapna maka la mela Dibata jadi Dibata kalak ndai, sabap enggo isikapkenNa sada kuta man kalak enda kerina. 

Ibas PJJ Minggu enda iingetken kita kerna Pendungi Tahun Gereja. Ibas ngertiken pendungi tahun gereja ibabai kita kubas perenungen kerna kegeluhen enda khususna kerna kalak silanai ras kita (sienggo leben idilo Dibata) Tentu labo guna ngonggar “ngonggar kayu buruk” sierbahanca turah/reh ka memori kecedaan ateta, tapi ibas pendungi Tahun Gereja enda mabai kita maka uga Tuhan ngaturken egeluhen enda termasuk ngingetken kita kerna penemani Tuhan Dibata kegeluhenta seh gia enggo itadingken siikelengi kita (Bapa, nande, anak, turang senina / keluarga) tapi Tuhan tetap ngarak-ngarak kegeluhenta seh paksa enda. 

Jenari ibas Pendungi Tahun gereja enda pe ibabai ka kita rukur ras ngerenungken kerna kegeluhenta...... labo ndekah..... kentisik ngenca........... seh ka ibas paksana kita pe arus ka “ngadap man baNa”. Sienda nuduhken man banta kai arus silakoken tupung lit denga kesempaten man banta ndalani kegeluhen enda. Istilah si rusur ipake “Momento Mori” : Ingetlah kerna wari kematendu... Sienda labo ka sieteh katawari kita mate.... tapi sipasti kita ibas paksana mate... jadi ibas kita nginget sienda enggo ibabai kita nggeluh tetap erpengendes man Tuhan Dibata. 

Heber 11:1-3; 6-16 Arah nats enda kita ibabai ngertiken kerna “Kiniteken”. Kiniteken man Dibata simada kerina sinepa langit ras doni bagepe singaturken kegeluhen enda kerina. Erkiniteken man Dibata tentu ihubungken ras keyakinenta man Dibata alu ndalani kegeluhen enda bagi siisuruhNa.... (Iman/kiniteken teridah arah buah-buahna). Erkiniteken berarti tetap ngandalken Tuhan (siiteki e) kutera kai pe sijadi : bagi ukur entah la bagi ukur, logika entah la gia terlogikaken, tetap setia sebab sieteh ibas kiniteken sibageme ndatken kemalemen ate bagepe keselamaten ibas Dibata nari. 

 Kesaksin nggeluh Nuah, Aberaham, Sara ibas erkiniteken ras setia nandangi padan ras perentah Tuhan, perukurenna secara manusia la ipelebeina, lit pe sila terlogikakenna tapi terus idalankenna, njadiken ia kalak si erkiniteken seh matena pe ia tetap mate ibas kiniteken man Tuhan. 

Ibas kinitekenna enda teridah maka Dibata erkeleng ate alu tetap nehken padanNa man bana seh malem atena erkiteken la mela Dibata jadi Dibatana alu mereken pemere ras pasu-pasu simbelin. Arah bahan enda kita pe iajuk : 
  1. Jadilah kalak sierkiniteken ibas ndalani kegeluhen enda alu tetap erpengendes man baNa simada kegeluhen enda. 
  2. Tetap setia erkiniteken kutera kai pe siman alanken ibas ndalani kegeluhen enda : bagi ukur entah la gia bagi ukur ibas perdalanen geluh enda. 
  3. Berani tampil beda erkiteken kita enda eme anak-anak Dibata sitetap arus ncidahken kemuliaan Dibata ibas kegeluhen enda. 
  4. La mela jadi anak Dibata sebab Dibata labo pernah mela mersoken kita jadi anakNa... Berbahagia, berbanggalah selaku anak Dibata. 
  5. Lit paksana kita arus nadingken doni enda... tapi ibas kerinana arus sigelem : Nggeluh ntah mate gia tetap setia ibas Tuhan 
  6. Ingetlah maka kita pe pasti nge “mate” ; Momento Mori.....jadi dalani kegeluhen enda alu tetap setia man Dibata simada kegeluhen bagepe kematen (kemenangen selaku anak Dibata). 7. Tupung kita setia maka Dibata lebih setia ngkelengi kita. 
  7. Malem ateta erkiteken kinitekenta man baNa.... Enggo isikapkenNa ingan man banta... gelah ija Ia... ije kita...Terpujilah Tuhan.. 
Pdt.Alexander Simanungkalit

Related Articles



0 comments :

Post a Comment